Министерството одговорно за функционирање на политичкиот систем, не работи согласно неговите основни постулати

Министерството за политички систем и односи меѓу заедниците, со кое раководи Првиот потпретседател на Владата, Артан Груби, во своите основни надлежности буквално има дефинирано грижа за „функционирање на политичкиот систем“, но сепак, токму тоа е институцијата која не го исполнува основниот услов како орган на државната власт во Република Македонија.

Имено, официјалната интернет страница на ова ново министерство достапна е само на албански јазик. На веб страната од министерството има опција за македонски јазик, но доколку се кликне на истата, покажува дека е во изработка.

Инаку, ова ново министерство е формирано од сегашното владеjачко мнозинство на СДСМ и ДУИ, по што, со закон се укина Секретаријатот за спроведување на Рамковниот договор, а неговата опрема, документација и другите средства беа преземени токму од Министерство за политички систем. Откако е оформено ова министерство пред скоро две години, буквално нема никакви активности. И покрај тоа што истото е меѓу рекордерите по бројот на вработени, сепак, „црната дупка“ во однос на неговите активности го прави своевиден фантом во политичкиот систем на Република Македонија.

Од она што може да се види на интернет страницата на Владата за тоа кои се задолженијата на ова ново министерство, лесно е да се увиди дека истото е формирано како еден вид полицаец, кој ќе контролира институции за спроведување на „обврските кои произлегуваат од Рамковниот договор“, како и „следење на спроведувањето на правото на употреба на јазиците и писмата на заедниците“.

ПОЛИТИЧКА ПАРТИЈА ЛЕВИЦА
25 ноември, 2020

Најнови објави